ძვირფასო მოსწავლეებო, მშობლებო და მასწავლებლებო,

სკოლა „იმედის“ ხელმძღვანელობა ჩემთვის დიდი პასუხისმგებლობაა. ვაგრძელებ საქმეს, რომელიც მამაჩემმა, ცოტნე გველესიანმა, 1998 წელს დაიწყო. ჩემი მიზანია, ამ ისტორიას ახალი შესაძლებლობები შევმატო და „იმედი“ იყოს სკოლა, სადაც თითოეული მოსწავლე იღებს საფუძვლიან განათლებას, გრძნობს მხარდაჭერას და ხედავს საკუთარი განვითარების გზას.

ჩვენი რეფორმების მთავარი ამოცანა სწავლების ხარისხის გაუმჯობესებაა. ვაძლიერებთ ქართულს, მათემატიკასა და უცხო ენებს; განსაკუთრებულ ყურადღებას ვუთმობთ ინგლისურისა და გერმანულის სწავლებას. გვინდა, მოსწავლეებს ჰქონდეთ ცოდნა და ენობრივი უნარები, რომლებიც მათ საქართველოში თუ საზღვარგარეთ სწავლის გაგრძელების შესაძლებლობას მისცემს.

ამ პროცესში მნიშვნელოვანი ადგილი უკავია საგამოცდო ცენტრსა და რეგულარულ შეფასებას. ტესტის შედეგი ჩვენთვის შემდგომი მუშაობის საფუძველია: უნდა დავინახოთ, რა გაიგო მოსწავლემ, სად სჭირდება დახმარება და როგორ შეგვიძლია მისი წინსვლის ხელშეწყობა. შეცდომების გაანალიზებას, მიზნობრივ განმეორებასა და პროგრესზე დაკვირვებას სწავლების ყოველდღიურ ნაწილად ვაქცევთ. ამავე მიზანს ემსახურება გაკვეთილების მონიტორინგი და მასწავლებელთა პროფესიული განვითარების მხარდაჭერა.

ვავითარებთ სწავლების ისეთ მიდგომებს, რომლებიც მოსწავლეებს დამოუკიდებელ აზროვნებასა და ცოდნის გამოყენებას ასწავლის. დისკუსია, კვლევა, გუნდური პროექტები და არგუმენტირებული მსჯელობა ეხმარება ახალგაზრდებს, საკუთარი პოზიცია ჩამოაყალიბონ და განსხვავებული აზრიც მოისმინონ. ხელოვნური ინტელექტისა და თანამედროვე ტექნოლოგიების სწავლებაში ჩვენი მიზანია, მოსწავლეებმა შეძლონ ინფორმაციის გადამოწმება, ციფრული ინსტრუმენტების პასუხისმგებლობით გამოყენება და საკუთარი იდეების განხორციელება.

ჩვენი განვითარების გეგმებში მნიშვნელოვანი ადგილი უჭირავს საერთაშორისო თანამშრომლობასაც. ვმუშაობთ გერმანულ საგანმანათლებლო პარტნიორებთან კავშირების გაღრმავებასა და გაცვლითი პროგრამების შექმნაზე. გვსურს, მოსწავლეებსა და მასწავლებლებს ჰქონდეთ შესაძლებლობა, გაეცნონ სხვა ქვეყნების სასკოლო გამოცდილებას და მიღებული ცოდნა ჩვენს სკოლას გაუზიარონ.

ხარისხიან განათლებას სჭირდება უსაფრთხო გარემო, მკაფიო წესები და ურთიერთპატივისცემა. ჩვენთვის დისციპლინა გულისხმობს პასუხისმგებლობას საკუთარ სწავლაზე, სხვების დროსა და საერთო სასკოლო სივრცეზე. მშობლებთან ღია კომუნიკაცია კი აუცილებელია იმისთვის, რომ ბავშვის საჭიროებები დროულად დავინახოთ და მის განვითარებაზე ერთად ვიზრუნოთ.

მინდა, „იმედის“ თითოეულმა კურსდამთავრებულმა სკოლიდან წაიღოს მყარი ცოდნა, საკუთარი ძალების რწმენა და სწავლის გაგრძელების სურვილი. სწორედ ამ მიზანს ემსახურება ყოველი ცვლილება, რომელსაც ჩვენს გუნდთან ერთად ვახორციელებთ.

სულხან გველესიანი
სკოლა „იმედის“ დირექტორი